أعزائي طلبة 3 ثانوي الكرام ، تحية طيبة وبعد
في الوقت ده من السنة بيبدأ يتسرب جواك شعور اللخبطة والتوهان وممكن احباط كمان
والمشاعر السلبية بتستحوز على تفكيرك بس مش المفروض انك تسلم نفسك ليها لان خلاص كلها ايّام وماراثون الامتحانات هيبتدي
وإيماناً منّا بإن كل دفعة لازم يكون ليها دور في مساعدة الدفعة اللي بعدها ، قررنا طلبة الفرقة الاولى بكلية الطب بنات جامعة الأزهر
اننا نجمعلكم ملخص لتجربتنا على مدار سنة كاملة في وجهة نظرنا هي من أمتع سنين حياتنا
ملحوظة - الكلام ده من اكتر من بنت وبدون ترتيب مسبق ف سامحونا على عدم تناسق الكلام -
_ استعن بالله و ركز ثم ركز ثم ركز للمرة الألف واتخلص من توتر الامتحان المبالغ فيه
انسي اللي يعدي وخليه سبب يدفعك لقدام وخلي عندك ثقة ان الأفضل ليك هو اللي هيحصل ، ابذل انت مجهود بس وسيب الباقي على ربنا
_ خلي عندك ثقة كبيرة في ربنا و في نفسك وارض باللي انت بتعمله و أوصل لدرجة انك تحس انه خلاص مفيش حاجة ممكن تعملها اكتر من كدة ، جدد النية دايما و خليك متفائل وخليك لحوح في الدعاء
_ احرص دايما على تقوية صلتك بالله وطاعة الوالدين ثم طاعة الوالدين ثم طاعة الوالدين ثم بعد كدة المذاكرة
_ خلّي نيّتك كويسة وربنا سبحانه وتعالى هيكرمك ( على قدر نياتكم ترزقون)
_ اتعب وانوي بتعبك ده مرضاة ربنا سبحانه وتعالى ومتشغلش بالك بأنك هتوصل أو لا ربنا مختارلك مكان محدد و هيبعتك ليه كل اللي عليك انك تجتهد ، احنا بنزرع بس والتوفيق من ربنا ، ربنا هو اللي بيكرم واحنا علينا الالتزام بالدعاء
_ خليك مؤمن بحلمك ، خلّي كل كيانك و وجدانك متسلط بس على انك توصل لحلمك ،
هدفك كبير و يستاهل انك تتعب عشانه و تضحي بالغالي و النفيس في سبيل تحقيقه آمن انك هتوصل و ربنا هيسخر الكون كله في سبيل مساعدتك
_ اهم حاجه ف الوقت دا انو تنسى اي موقف سلبي حصل معاك طول السنة وافتكر بس حلمك.....ركز علي قد ماتقدر ..... واعلم يقينا ان الله مع الصابرين 😍😍
_ اليأس مرفوض شكلاً وموضوعاً متحسش أبداً ان الموضوع كبير أو انك متقدرش عليه بالعكس خليك واثق انك قدها وأثبت لنفسك انك بتقدر تتعامل مع المواقف الصعبة وادعي ربنا انه يبينلك طريق الصواب في الفترة الاخيرة دي
* كدة احنا اتكلمنا عن الجانب النفسي نيجي بقى لجزئية ننجز ازاي ، المذاكرة في الفترة دي لازم تكون not hard but smart ازاي بقى
_ الوقت ده وقت قلة النوم والقهوة ووقت مفوتش ثانية وحل كتير جدا امتحانات ازهر سابقة واصحح لنفسي الامتحان واقيم نفسي واعرف غلطاتي والشرعي والعربي طبعا بيبقا الثقافي طاغي عليهم لازم ياخدو وقتهم ويتراجعو كتيير ويخلصو والي فايتو حاجة يقسمها بحيث ميضيعش وقتو كلو فيها ويسيب الباقي طبعا وقت الدعوة بتذلل لربنا وقت القرآن مش اقل من ساعتين في اليوم ووقت الثقة بالنفس والثقة في ربنا انو لا يضيع اجر من احسن عملا ربنا معاكم
_ الوقت ده بجد اهم وقت ممكن تمر بيه طول السنة تقريبا لو لسه بتتعرف علي المنهج ومبتعرفش فيه حاجة
(في حاجات معينة طبعا)
ركز بقي في الكلام ده
انا مش بناقش مشكلة تعليم لكن احنا في واقع دلوقتي ممكن اي مشاكل تتأجل بعدين
المواد الي ممكن تكون مهتم بيها جدا من اول السنة اكيد الكيميا والفيزيا والاحياء والرياضة وENGLISH
طيب دول المفروض نعمل فيهم ايه دلوقتي لو تقدر تراجع كل حاجة عملتها من اول السنة والمدرس شرحها يبقي كويس
طيب مش هتقدر يبقي الأسئلة الي كانت بتقف قدامك بس تراجعها ومذاكرتهم ولمهم دلوقتي اهم
الامتحان بيجي ازاي اولا الأحياء لازم تكون فاهمها وحط تحتيها ألفين خط
لان الامتحان بيبقي سهل اوي للي فاهم عكس ما المعظم فاكر
الازهر طبعا الأسئلة مش عارفة بيجبوها منين بس والله لو فاهم مفيش سؤال هيقف قدامك
وطبعا الحل دا كان مهم فيهم كلهم جدااااا بس اول السنة لحد دلوقتي دلوقتي المهم أننا نلم المنهج مذاكرة او مراجعة وطبعا بالنسبة للرياضة اوعي تدخل الامتحان بدون النماذج مطلقا وال English
كمان
العربي والشرعي - بالنسبة للأزهر -
الشرعي لو مفتحتوش من اول السنة تقدر تلمه وتقفله الشهر ده
بجد مش كلام طيب المفروض نعمل ايه اكيد هنكثف المذاكرة شوية ونتعب شوية معلش بقي اهو شهر
اذاكر مثلا في أسبوع كل الشرعي وأراجعه كتير جدا اققسم الدروس وتقدر والله كله وتقفله كله لان غالبا الامتحان مش هيخرج عن كتاب المدرسة الا الفقه طبعا وبرضو مش بيخرج بس لازم مع المذاكرة حل عشان لو حب يلف
العربي البلاغة والصرف والنحو
الحل فيهم اهم من المذاكرة من وجهة نظري وبعد الحل المذاكرة اهم
يعني ايه ؟
يعني ذاكرت كل الأسئلة وحليتها أمسك المنهج كله مذاكرة قوية
والنصوص والأدب المذاكرة فيهم اهم من الحل
ولكن مقلتش الحل مش مهم !!!هو مهم جداااا في كل المواد بس تقدر تلمه دلوقتي في مواد ومواد لا
تمام كدا تقريبا كله وبدون تفصيل لو اي حد محتاج اي كلام زيادة عن اي مادة انا معاكو في اي وقت
وانت بتذاكر اخلص النية لله وحط حلمك قدام عينيك وتعب اهلك واستودع المذاكرة وحافظ علي علاقتك بالله لان لو حتي الي انت كنت فاكره الخير ليك وبتتمناه ومثلا ما دخلتوش لاء سبب اكيد هو الخير حتمااااااااااااااا
طالما أخذت بالاسباب
عمر المذاكرة ما كانت العامل الوحيد ولا حتي الأساسي للتفوق
هتعرفوا الكلام ده و تتأكدوا منه بعدين
هي تقريبا اخر عامل
وتقدر تنجز كل شئ في اققل وقت وعلي اكمل وجه
في اقل وقت وعلي اكمل وجه
في اقل وقت وعلي اكمل وجه
ربنا يوفقكم لكل خير
حط حلمك قدامك واستعين بالله رضي اهلك مذاكرتك
مذاكرتك لو لسه بتبدأ في حاجة يستحسن التكرار
ودمتم بخير
_ كأزهرية لازم نهتم بالشرعى و العربى جدا لأن عليهم 60 %من الدرجات .و معظم الناس بتهملهم و تركز على المواد التانية مش عارفة ليه .
و متضيعش وقت ف الدروس برة البيت .خد مع مدرس واحد و وفر وقت للمذاكرة في البيت
ومتغشش متغشش متغشش
ناس كتير أعرفهم كانوا بيغشوا
ف 1 و 2 ثانوى وكانوا بيطلعوا أوائل و بفضل الله فى سنة تالتة ماجالهمش طب بشرى
و دخلوا كليات ماكانوش متوقعينها حتى لو كلية حلوة بس كانوا فاكرين نفسهم هيجيبوا أعلى من كدة .
.الغش دة حاجة بشعة.
و حتى لو مش فاكر حاجة معينة ف الامتحان و عاوز تغش من حد لازم تفتكر :و من يتق الله يجعل له مخرجا و يرزقه من حيث لا يحتسب..
حل امتحانات كتير جدا ف كل المواد
دة هيكسبك ثقة و مش هيخوفك م الامتحان و عشان تتعود على الأسئلة الغير مباشرة و كدة
_ بلاش تنقلات بين دروس المراجعة ، المدرس اللي بتاخد معاه
راجع معاه الكم اللي بيحدده راجع الدرس من اول و جديد تاني والأسئلة كمان
_ وأخيراً : مفيش حد فينا في يوم النتيجة مبيعيطش بس الفرق ان في ناس بتعيط من الفرحة و الفخر وناس بتعيط من الحسرة و القهر
منار عبدالرحيم - أولى طب